Braktisja e pasaportave serbe shton numrin e kosovarëve

Numrin më të madh të të huajve të ardhur në Zvicër nga gushti i vitit te kaluar deri në fund të gushtit 2013 e përbëjnë shtetasit e Portugalisë, (15874) ndërsa në vendin e dytë janë kosovarët, (12961).

Numri i shtetasve të huaj në Zvicër në fund të muajit gusht është shtuar për 3.3 për qind në krahasim me një vit më parë. Kjo ka bërë që përqindja e të huajve ë këtë vend të ngjitet në 23.2%, bën të ditur Enti Federal i Statistikave në Bernë. Në bazë të llogarisë së bërë nga ky ent shumica e të huajve gjatë kësaj periudhe kanë ardhur nga vendet anëtare të Bashkimit Evropian.

Numri i shtetasve të BE-së dhe të EFTA-s është rritur për 54000 veta.

Në fund të gushtit në Zvicër jetonin gjithsej 1864699 të huaj ose 60148 më tepër.

Numri më i madh i të huajve të ardhur në Zvicër gjatë periudhës gusht 2012 – gusht 2013, janë shtetas të Portugalisë, ndërsa në vendin e dytë janë ata nga Kosova dhe në të tretin gjermanët.

Numri i kosovarëve është shtuar për 12961 persona ndërsa i portugezëve për 15 874, i gjermanëve për 8071 etj. Gjithsej shtetas të Kosovës në Zvicër, sipas statistikës më tër re janë gjihsej 90‘274. Ky numër, sigurisht, nuk i perfshin kosovarët të cilët ende mbajnë pasaportat se Serbisë dhe as ata që kanë marrë shtetësinë zvicerane.

Nga ana tjetër rënien më të madhe e ka shënuar numri i shtetasve të Serbisë, të Bosnjës dhe Hercegovinës si dhe të Kroacisë. Në Zvicër në fund ¨të muajit gusht ka pasur 13030 shtetas serbë më pak se një vit më parë. Ndërsa numri i kroatëve është zvogëluar për 1144 dhe i boshnjakëve për 563 veta.

Shtimi i numrit të kosovarëve korrespondon pothuajse në tërësi me numrin e zvogëluar të shtetasve serbë, gjë që shpjegohet me braktisjen e pasaportave serbe nga kosovarët dhe marrjen gjithnjë më shumë të pasaportave kosovare./albinfo/