Bosch: Specialja duhet të bëhet

Ambasadori Holandez i akredituar në Kosovë, Robert Bosch, e ka rikonfirmuar qëndrimin e tij rreth Gjykatës Speciale për krime të luftës. Ai ka thënë se themelimi i kësaj gjykate është përgjegjësi e institucioneve të Kosovës dhe kjo duhet të bëhet.

“Nuk jam i kënaqur me institucionet kosovare. Themelimi i Gjykatës Speciale është nje obligim që shteti i juaj duhet ta përmbushë”, ka thënë Bosch në emisionin “Info Magazine” të Klan Kosovës .

“Është vendosur kësisoj nga komuniteti ndërkombëtar dhe duhet ta bëni. Krijimi i speciales nuk ka të bëjë me dënimin e shqiptarëve, sepse askush nuk ka pse të frikohet kur është i pafajshëm, madje pastrohet emri juaj”.

“Gjykata Speciale do të kalojë në fund, sepse alternativat tjera janë më të këqija dhe këtë e dinë të gjithë”.

“Porosia nga BE-ja për Gjykatën është e qartë”.

Bosch: Gropat i mbusha që të jap shembull për të tjerët

Ambasadori holandez, Robert Bosch tha se gropat e mbushura nga ai nuk ka qenë ndonjë kundërvënie ndaj pushtetit lokal të Prishtinës ose diçka e tillë, por vetëm ka qenë një sanim i një problemi që i ka penguar.

Ai bile tha se ka mbushur gropa edhe në Suedi, pasi që nga ky shtet e ka gruan, mirëpo Bosch, ka thënë se një gjë të tillë e ka bërë edhe në vendlindjen e tij në Holandë.

“Gropat e fundit që i kam mbushur nuk kanë qenë para ambasadës sime, por në një rrugë që kaloja çdo ditë dhe ato më pengonin sepse funksiononte vetëm një korsi e rrugës”, tha Bosch në Info Magazine të Klan Kosovës.

“Kjo iniciativë është bërë nga unë që të jepet shembull për të tjerë, sepse ato gropa ju pengojnë”, shtoi në fund Bosch.