Borxhi 400 milionësh nuk falet

Borxhi i konsumatorëve të Korporatës Energjetike të Kosovës ka mbërri në 400 milionë euro. Drejtuesit e Qeverisë kanë garantuar se këto borxhe assesi nuk do të falen.

Valon Syla, Këshilltar për Marrëdhënie me Publik Njësia e Privatizimit KEDS, tregon se për të realizuar mbledhjen e këtyre borxheve, ekspertët e KEK’ut, të mbikëqyrur edhe nga Këshilltari i Transaksionit IFC, kanë hartuar Marrëveshjen për Mbledhjen e Borxheve të Vjetra që në fakt do të shërbejë si një marrëveshje midis KEK’ut të mbetur dhe privatizuesit Kosovo Calik Limak Energy.

“Borxhet e vjetra ndaj Korporatës Energjetike të Kosovës kanë arritur mbi 400 milionë euro, kështu së paku raportohet nga menaxhmenti i KEK. Këto borxhe datojnë qysh nga koha e administrimit të UNMIK me Kosovën dhe KEK’un, e deri më sot”, tha Syla.

Ai tregoi se marrëveshja ka këto kushte – privatizuesi për mbledhjen e borxheve mbi 10 mijë euro përfiton 15 për qind nga shuma e borxhit të mbledhur. Ndërsa, për borxhet nën 10 mijë euro përfiton 25 për qind nga shuma e borxheve të mbledhura. Mirëpo, sipas tij, një gjë duhet të jetë e qartë për të gjithë se borxhet ndaj KEK’ut, nuk do të falen dhe duhen të paguhen. Sa i përket bazës ligjore për Marrëveshjen për Mbledhjeve të Borxheve të Vjetra, tha ai, ajo është hartuar sipas ligjeve të vendit në fuqi dhe ngërthen karakter komercial të marrëveshjes, për mbledhjen e borxheve ndaj KEK’ut, midis KEK’ut të mbetur dhe kompanisë së re Distribucionit dhe Furnizimit, KEDS – Kosovo Calik Limak Energy.

“Interesi i Qeverisë së Kosovësështë që të mblidhen borxhet ndaj KEK’ut i cili me paratë e mbledhura do të mund të investoj në kapacitetet e gjenerimit dhe revitalizimin e këtyre kapaciteteve gjeneruese të energjisë elektrike”, tregoi Syla.(express)