Boksierët më të mirë të Kosovës stërviten në Gjilan

Gjilan – Palestra “Bashkim Selishta-Petriti”, deri me 23 Shtator do të jetë nikoqire e boksierëve më të mirë të Kosovës, për tu përgatitur për Kampionatin Ballkanik i cili do të mbahet në Albena të Bullgarisë duke filluar me 25 Shtator.

Nën drejtimin e ushtruesit të selektorit të Kombëtares së Kosovës, Musli Zymberi e trajnerëve Afrim Majanc e Burhan Xhafa, djersa e boksierëve në stërvitjet e tyre shkonte rrëke. Boksierët e Kosovës bëjnë stërvitje dy herë në ditë nën vëzhgimin e trajnerëve që nuk ju humbë asgjë nga syri.

“Është dita e dytë e stërvitjeve dhe jam shumë i kënaqur me përformancën e boksierëve. Tani është vetëm fillimi, ushtrimet janë tejet intensive nga dy herë në ditë – paradite zakonisht kemi ushtrimet kondicionale, ndërsa pasdite kemi ushtrimet taktike në Palestër. Të gjithë boksierët janë duke e dhënë kontributin e tyre që të jenë sa më të përgatitur për Kampionatin Ballkanik, disiplina është në nivel të lartë dhe çdo boksier po i përfundon detyrat ashtu sipas plan-programit tonë”, ka theksuar ushtruesi i detyrës së Selektorit, Musli Zymberi.

Një mendimit janë edhe dy trajnerët Afrim Majanci e Burhan Xhafa, të cilët me eksperiencën e tyre kanë bërë që boksierët të jenë sa më të përgatitur.

“Është kënaqësi të punosh me këta djelmosha. Jemi të kënaqur me interesimin e tyre për tu përgatitur sa më mirë, kur dihet se në Kampionatin Ballkanik ka boksier shumë cilësor, por edhe ne kemi adutet tona. Urojmë që gjithçka të shkojë sipas plan-programit tonë”, kanë bërë të ditur dy trajnerët Majanci e Xhafa. Boksierët të cilët priten të udhëtojnë drejt Albena të Bullgarisë me 25 shtatorë janë: Bashkim Bajoku Lorent Murati Loris Idrizi Shpëtim Bajoku Patriot Behrami Taulant Jakupi./rajonipress/