Blloku s’është si dikur

Mbajnë takime bashkë, dalin në kafe bashkë, qëndrimet publike i kanë në një vijë. As në Gjykatë Kushtetuese nuk patën pranuar të shkojnë të ndarë.

Por kjo pamje e Bllokut nuk është krejt reale. Tash, përfaqësuesit e partive në Bllok, kanë filluar të zhvillojnë takime të ndara me presidenten. Por vëmendja është më tepër e përqendruar kah lëvizjet e liderit të LDK-së Isa Mustafa.

Burime të gazetës kanë bërë të ditur se ky takim ka qenë më ndryshe nga takimet që shefja e shtetit i ka zhvilluar me liderët e tjerë partiakë. Takimi Jahjaga-Mustafa, sipas të njëjtave burime, thuhet se ka qenë “sy më sy”, pa prani të zyrtarëve të tjerë. Kjo gjë është e verifikueshme edhe në kolazhin e fotografive të postuara nga Presidenca.

Derisa në takimin me Hashim Thaçin vërehet prania e Kadri Veselit, në takimin me Ramush Haradinajn vërehet prania e Blerim Shalës, në takimin me Albin Kurtin vërehet prania e Visar Ymerit dhe në takimin me Fatmir Limaj vërehet prania e Bilall Sherifit, në takimin me Mustafën s’vërehet prani tjetër. Se, takimi me Mustafën ka qenë pak më ndryshe, e ka mohuar këshilltari i presidentes, Arbër Vllahiu.