Për më shumë se pesë muaj koalicioni LAN, pavarësisht dallimeve të mëdha, i qëndroi besnik marrëveshjes. Por, tash nuk mund të thuhet se ky bllok vazhdon të jetë si dikur. LDK dhe AAK në vend se të insistojnë në thirrjen e seancës konstituive të Kuvendit, po i mbledhin strukturat e veta për të diskutuar rreth postit të kryeministrit. E, pikërisht ky post po del të jetë “mollë sherri”, dhe pika ndarëse e Bllokut.
Bajram Gecaj, nga Lidhja Demokratike e Kosovës, ka thënë se kjo parti po e kërkon rikonfigurimin e marrëveshjes së 10 qershorit, sepse, sipas tij, marrëveshja e 10 qershorit nuk ekziston më. “Edhe Isa Mustafa edhe Ramush Haradinaj publikisht kanë deklaruar se nëse marrëveshja nuk implementohet si e plotë, ajo bie poshtë.
Sa i përket, Lidhjes Demokratike të Kosovës, ne konsiderojmë se nuk ka marrëveshje, pra ne nuk po marrim veprime të njëanshme, sepse ne si koalicion i madh, të gjithë partneret jemi pajtuar që të heqim dorë nga pozita e kryeparlamentarit. Pra, ka qenë marrëveshje e të gjithëve që të heqim dorë dhe si e tillë në mënyrë indirekte të gjithë partnerët janë pajtuar se marrëveshja ka rënë poshtë”, ka thënë Gecaj…(Tribuna).
