Sekretari Amerikan i Shtetit, Anthony Blinken, duke kujtuar vlerat e tanimë të ndjerës, ish-Sekretares së Shtetit, Madeleine Albright, ka thënë se ajo ishte një diplomate brilante, një udhëheqëse vizionare, një pioniere e guximshme, një mentore e përkushtuar dhe një person i madh dhe i mirë që i donte thellësisht Shtetet e Bashkuara.
Sipas tij, ajo ishte gjithashtu një shoqe e mrekullueshme për shumë njerëz, përfshirë edhe në raport me Blinken.
Veç kësaj, ai ka kujtuar rrugëtimin e vështirë, i cili gjithsesi ndikoi edhe në formimin e saj, përcjell Telegrafi.
“Pasi mbërriti këtu si refugjate në moshën 11-vjeçare, ajo nuk e harroi kurrë bujarinë që Amerika tregoi ndaj familjes së saj kur ata kishin më shumë nevojë. Pasi e pa Amerikën në më të mirën e saj, ajo nxiti pamëshirshëm që ne të përmbushnim rolin tonë si një fener moral dhe mbrojtës i lirisë”.
“Dhe pasi kishte përjetuar tmerret e luftës nga afër – duke ikur nga Çekosllovakia pasi atë e pushtuan nazistët, më pas duke u fshehur në strehimore ndërsa bombat gjermane binin në Londër – ajo besonte se Shtetet e Bashkuara duhet t’i përgjigjen me forcë diktatorëve dhe tiranëve”.
Blinken kujton gjithashtu se Albright krijoi Komunitetin e Demokracive, një koalicion vendesh që mbron vlerat demokratike në mbarë botën.
“Dhe edhe falë saj, Polonia, Hungaria dhe Republika Çeke iu bashkuan NATO-s dhe Shtetet e Bashkuara mbrojtën shqiptarët etnikë në Kosovë kundër agresionit serb”.
Në pjesën e fundit, Blinken vë në pah faktin se sot, ka një shesh dhe një rrugë në Kosovë me emrin Madeleine, dhe një statujë e saj qëndron në kryeqytetin e Kosovës, Prishtinë. /Telegrafi/
