Blick: Albian Hajdari e lë Zvicrën për Kosovën

Qendërmbrojtësi Albian Hajdari duket se ka zgjedhur ta përfaqësojë Kosovën në nivelin ndërkombëtar.

Ylli i Hoffenheimit ka ndjekur rrugën e Leon Avdullahut, për t’u bërë lojtari i radhës që do të mbrojë fanellën dardane.

Siç raporton gazeta e madhe zvicerane “Blick”, Albian Hajdari ka vendosur përfundimisht t’i bashkohet Kosovës.

“Pas largimit të Eman Kospos dhe Leon Avdullahut, një tjetër talent zviceran po e ndryshon kombëtaren. Pavarësisht disa thirrjeve të kombëtareve, Albian Hajdari e ka zgjedhur Kosovën”, njofton “Blick”.

Gazeta zvicerane ndër të tjera shton se Hajdari e refuzoi ftesën e Zvicrës në muajin shtator shkaku që po përshtatej te Hoffenheim, kurse tani do ta mbrojë fanellën e Kosovës.

“Në shtator, Albian Hajdari donte të fokusohej në rolin e tij te Hoffenheim. Pas tre paraqitjeve, 22-vjeçari gjithashtu dëshiron të luajë në kualifikueset e Kupës së Botës. Këtë herë, sidoqoftë jo te Zvicra, por për Kosovën. Vendimi është marrë plotësisht nga Hajdari”.

“Për dallim nga Avdullahu, çështja e Hajdarit është më e dhimbshme për Federatën Zvicerane. Ish lojtari i Luganos është ftuar disa herë nga Murat Yakini në ekipin A”.

Mbetet të shihet nëse Hajdarit do t’i kryhen dokumentet me kohë për ta përfaqësuar Kosovën qysh në ndeshjet e tetorit, ndaj Sllovenisë dhe Suedisë./Telegrafi/