Bleron Mulliqi ardhmëria e futbollit të Kosovës

Gjilan – Futbollit të Kosovës po i shtohet edhe një talent i madh i futbollit e ky është Bleron Mulliqi, i cili me aftësitë e tija të futbollistit po i mahnitë njohësit e futbollit.

Futbollisti 16 vjeçar i cili po tregon lojëra spektakolare në skuadrën Franceze, FC Thonon Evian, ka bërë që ky futbollist të vesh për herë të parë fanellën e Përfaqësueses së Kosovës U19.

Sulmuesi shtatgjatë, i gëzuar për paraqitjen e tij në fanellën e Kosovës është shprehur i lumtur.
“Jam shumë i lumtur që po debutoj në fanellën e shtetit të Kosovës, vendlindjen e prindërve të mijë, jam shumë i emocionuar me grumbullimin e sotëm që kemi pasur në Prishtinë, në mesin e shumë bashkëlojtarëve kam vërejtur edhe futbollist tjerë nga diaspora dhe ishim të lumtur që do të derdhim djersën për shtetin e Kosovës”.

Mulliqi i cili luan në rolin e sulmuesit po bënë emër tek skuadra e tij Franceze, FC Thonon Evian, ndërsa ka aspirata që tërë potencialin që ka prej futbollisti të jep më të mirën për Përfaqësuesen e Kosovës.
“Do të mundohem të jap më të mirën gjatë këtyre tri ditëve të grumbullimit që kemi në Prishtinë, për të bindur trajnerin Ramiz Krasniqi për kualitetet të cilat i posedoj, ndërsa jam shumë i kënaqur me atmosferën në Përfaqësuese por edhe me stërvitjen e parë që kemi bërë nga stafi i Përfaqësueses”, ka bërë të ditur sulmuesi Bleron Mulliqi, me prejardhje nga Raushiqi i Pejës.

Mulliqi ka një ëndërr të cilën po e bën realitet dhe atë do ta tregon me anë të lojës së futbollit.
“Jam shumë krenar dhe mburrem që jam Kosovarë, duke e ditur vështirësitë që i kemi pasur si popull dhe ne gjenerata e re e futbollistëve duhet të japim dhe ti kalojmë aftësitë e tona për rezultate pozitive të Përfaqësueses, këtë e meriton populli i Kosovës dhe shteti i Kosovës”.

Grumbullimi i Përfaqësueses së Kosovës tre ditor është duke u mbajtur në stadiumin e 2 Korrikut në Prishtinë./rajonipress/