Blerina Shala dhe tufa e vjershave të saja për fëmijë…

Gjilan – Para do kohë, Blerina Shala, 24-vjeçare nga Gjilanit, ka botuar një tufë vjershash me titull “Ëndrrat e mia”. Është një tufë vjershash të këndshme për fëmijë, të cilat janë kënduar me një lirizëm të hollë nga një vashë e re gjilanase, cila vargjet i kupton si kënaqësi jete e pune. Janë vargje joshëse që “rrëfejnë” ëndrrat e poetës së re, e cila e ka plotësuar një dëshirë të saj të etshme për të dalë me një vepërzë të vogël, por mjaft joshëse për të vegjlit. Me fjalë të tjera, ajo (Blerina), me botimin e veprës, sikur jetën e sheh si një parajsë të njeriut duke jetuar plot shend e verë. Jo vetëm kaq.

Kur e ka botuar veprën në fjalë, Blerina Shala ishte nxënëse e Shkollë fillore “Musa Zajmi” në Gjilan. Një nxënëse e shkëlqyeshme, e cila, nga klasa e parë e gjer në mbarim të shkollimit në fjalë, ishte me nota pesa. Pra, një shkollare shumë e përkushtuar në mësime dhe dije për jetë.

Por, prindi i saj, Muhamed Shala, shton se, Blerina është një shkollare e zgjuar dhe me prirje.”Po, tha ai,- vajza jonë Blerina është një shkollare e zonja, e cila, shkollimin e ka kuptuar si nevojë dhe aktivitet të pandërprerë në jetë. Nga fillimi i shkollimit, ajo ka qenë nxënëse e shkëlqyeshme. Shih për këtë, edhe arsimtarët e shkollës shumë e kanë pëlqyer aktivitetin e saj si në mësime, po ashtu edhe në aktivitetet e lira shkollore. Librin gjithnjë e ka dashur dhe nuk e ka lëshuar asnjëherë nga dora. Ka lexuar pa u ndalë. Në fletoret e saja filluan të hartoheshin vjersha lirike për fëmijë, të cilat “rrëfenin” krejt jetën në familje e në shkollë.

Pa e kryer shkollën fillore, ajo pati dëshirë që vjershat e saja të zënë vend në ndonjë libër. Me kohë ia plotësuam dëshirën, duke ia botuar tufën me vjersha për të vegjlit me titull: “Ëndrrat e mia”. Pse jo, shton Muhamedi, i cili flet fjalë miradije për vajzën e tij Blerinën.

Edhe ëma e saj, Makfire Shala, shton se, vajzën e tyre e kanë një shkollare shumë punëtore. “Blerina na është një yll i jetës sonë. Me veprën e saj poetike, sikur ajo po e rrit gazin e jetës. Dhe, sa kreu shkollimin fillor, ajo sot është regjistruar në Fakultetin e Mjekësisë në Tetovë. I gëzohemi suksesit të saj, e cila, çdo ditë po hapëron me sukseset e pandalura në studime. Por, kur është fjala tek vepra e saj poetike, ajo në vete ngërthen afro 30 vjersha për fëmijë. Janë këto vjersha të çiltërta dhe shumë joshëse për moshën e saj të re.

Blerina Shala ka shkrua vjersha për hënën, vëllaun, njeriun, nënën, ariun, mësuesen e parë, shkollën ëndrrën, buzëqeshjen, stinët e vitit, 8 Marsin, bletën punëtore, harabelin, mërgimin e disa të tjera. Ja si shton në vjershën për nënën: “Ti je dritë/ ti je jetë/ ti je dielli/ I vërtetë..(f.12). Kurse për mësuesen e parë, ajo ka kënduar këto vargje: “Me dorën e butë/ M’ledhatonte faqet/ Mësuesja në ëndërr/ Shpesh më shfaqet”(f.19). Shkolla parë, për Blerina Shalën është një “kuti” magjike. Ajo shton: “Shkolla ime/ Si kuti magjike/ Si zogjtë në fole/Na pret moj mike…(f;20). Ndërsa për mërgimtarin, poetja e vogël ka shtuar: “I përvëlon malli/ I djeg sikur një rrufe/ Mezi presin ditën/Të kthehen në atdhe…(f.33).

Pra, Blerina Shala është një vajzë e re që premton. Ajo ka hyrë në botën magjike të artit, e cila, krahas dijeve të tjera, poezinë e ka në gjak dhe nuk e lë pa hartuar vargje, të cilat, në një ditë të afërme, ajo do të dali me veprën e dytë poetike. Në fund i shtuam një fjalë të ngrohtë urimi: Të lumtë, Blerina Shala, studentja e mjekësisë!”/tefik selimi/rajonipress/