Bleona: Shqiptarët s’kanë turp, nuk më mbështetën kurrë

Në skenën e ‘American Music Awards’ shkëlqyen yje si Taylor Swift e Beyonce,por në tapetin e kuq ishte Bleona mbretëreshë e padiskutueshme.

Forma marramendëse dhe sjellje e guximshme për artisten shqiptare, që eklipsoi koleget më të famshme se ajo, duke sfiluar në perizoma e taka të larta. Për të kompletuar pamjen, një fustan prej rrjete të zezë, duke e bërë ‘nude-look’ (zhveshjen) edhe më seksi e intriguese”.

Kështu e ka përshkruar agjencia italiane e lajmeve “TG COM24″, shfaqjen e Bleonës në tapetin e kuq të ndarjes së çmimeve AMA. Në fakt, kjo nuk ishte hera e parë që Bleona shfaqej në tapetin e kuq. Prej vitesh në Amerikë ajo ka sfiluar në evenimente shumë të rëndësishme, duke u shfaqur e bukur siç është e me fustane të zgjedhura me kujdes.

Mirëpo përveç komenteve në mediet shqiptare apo ndonjë artikull i rrallë në ato të huaja, artistja nga Tirana ka kaluar pa u vënë re. Deri këtë herë, derisa Bleona e gjeti mënyrën që të gjithë të flasin për të. Këngëtarja është shprehur shpesh se e rëndësishme është që të flasin, pavarësisht se çfarë thonë. Këtë herë Bleona ia arriti qëllimit, me një veshje të papritur, por që bëri përshtypje te të gjithë.

Siç e kemi parë, nga komentuesit shqiptarë në rrjetet sociale, kishte më së shumti kritika, por edhe tallje. Mbështetësit e Bleonës në Shqipëri kësaj here mbetën nën hije, thuajse të padukshëm. Pikërisht kjo duket se e ka lënduar këngëtaren. Duke folur për “Gazeta Shqiptare”, Bleona Qereti është shprehur se zgjedhja e saj bëri bujë të madhe, por shqiptarët sërish nuk e mbështetën.

“Nuk e kuptoj si s’kanë turp shqiptarët që nuk më mbështesin mua në këtë nismë që e kam ndërmarrë komplet e vetme, pa pikë ndihme”, tha këngëtarja. Në këto kohë kur në Hollivud dhe Amerikë, personazhet e njohur dalin zhveshur për arsye të ndryshme si marketingu, tregu, fama, nga Shqipëria e largët ata ndiqen, pëlqehen, kritikohen, shahen por edhe lavdërohen. Kur këtë e bën një vajzë shqiptare që tashmë është pjesë e botës së showbizit në Tokën e Premtuar, nga Shqipëria e largët sigurisht që ndiqet, por edhe sulmohet fort./indeksonline/