Blazheviq: Kosova? Pse jo!

Ish-trajneri i Prishtinës, Çiro Blazheviq, nuk e përjashton mundësinë që të bëhet një ditë përzgjedhës i përfaqësueses së Kosovës. Në një prononcim për portalin ‘Klix.ba’, kroati ka folur rreth vendimit të fundit të FIFA-s për ndeshjet miqësore ndërkombëtare të Kosovës dhe mundësisë që ai të bëhet përzgjedhës i përfaqësueses sonë, mundësi të cilën nuk e përjashton aspak

“Çështja e Kosovës është politike. Unë nuk dua të flas më shumë për një gjë të tillë. Duam apo s’duam ne, Kosova do të vazhdojë të luftojë për pavarësinë e saj. Nuk është e përjashtuar mundësia që një ditë unë të jem përzgjedhës i tyre”, ka deklaruar ai. Të kujtojmë që Blazheviq ka përvojë të konsiderueshme me përfaqësuese, pasi që më herët ka drejtuar Zvicrën, Kroacinë, Iranin, Bosnjën dhe Hercegovinën e Kinën (U-23). (A. K.)

Ish-futbollisti i disa skuadrave kosovare, Arsim Plepolli, gjatë ditëve të fundit ka qëndruar në Bosnje dhe Hercegovinë. Ai aty është takuar me trajnerin Çiro Blazheviq, foton me të cilin e ka postuar në faqen e tij në rrjetin social ‘Facebook’. “Me trajnerin më të madh, Çiro Blazheviq”, shkroi ai në foton e cila mori qindra pëlqime…(Tribuna – Arena).