Biznesmenët jashtë Kuvendit

Pasuria e të gjithë deputetëve biznesmenë në mandatin e kaluar ka peshuar rreth 407 milionë euro, ndërsa pasuria e të gjithë deputetëve biznesmen për mandatin e ardhshëm është vetëm 50 milionë euro.

Jo të gjithë biznesmenët që vrapuan pas karriges së deputetit mblodhën votat për të qenë deputetë të ardhshëm në Kuvendin Kosovës.

Biznesmeni më i madh në Kosovë, Behgjet Pacolli (AKR), nuk arriti të bëhej deputet në këto zgjedhje.

Pasuria e Pacollit, e paraqitur në formularët e Agjencisë Kundër Korrupsionit, peshon 340 milionë euro.

Hashim Deshishku, biznesmen (LDK), po ashtu mbeti jashtë Kuvendit. Deshishku, pasuri në AKK ka deklaruar rreth 9 milionë euro.

Edhe Florin Krasniqi, biznesmen (VV), nuk arriti të bëhej deputet. Pasuria e Krasniqit, sipas AKK-së, është 5 milionë e 798 mijë euro.

Shaip Muja, biznesmen (PDK), gjithashtu ka mbetur jashtë Kuvendit dhe pasuria e deklaruar e tij në formularët e AKK-së është 2 milionë e 416 mijë euro.

Ndërkaq deputetët që kanë mbledhur vota të mjaftueshme për të qenë deputetë për katër vjetët e ardhshëm, pasuria e tyre është më e vogël se e gjithë atyre që kanë mbetur jashtë institucionit ligjvënës.

Është vetëm 30 për qind e pasurisë së deputetëve biznesmenë që do të jenë deputetë sërish.

Ndërkaq shtrohet pyetja: pse mbetën këta deputetë jashtë? Duket se elektorati apo votuesit e tyre nuk ishin të kënaqur me punën dhe me angazhimet në Kuvendin e Kosovës.

Njëri prej biznesmenëve ndërroi partinë dhe i mbijetoi sfidës për të qenë deputet.

Ramiz Kelmendi, biznesmen (PDK), ka marrë vota të mjaftueshme për të qenë deputet dhe pasuria e tij e paraqitur në formularët e Agjencisë Kundër Korrupsionit është 49 milionë e 347 mijë euro.

Edhe Besim Beqaj ka marrë vota të për të qenë deputet në katër vjetët e ardhshme në Kuvend.

Pasuria e Beqajt, e paraqitur në formularët e AKK-së, është rreth një milionë euro.

Për herë të parë Margarita Kadriu, biznesmene (PDK), ka marrë vota të bollshme për të hyrë në Kuvend.

Ajo asnjëherë nuk e ka paraqitur pasurinë në AKK, pasi më parë nuk ka mbajtur post publik.

Biznesmenët e tjerë që ia kishin mësyrë për tu bërë deputet dhe nuk morën vota të mjaftueshme janë: Nazmi Bytyqi(LDK), Fadil Berjani(LDK), Florin Krasniqi(VV), Shkëlzen Jusaj(AAK), Hashim Deshishku(LDK), Irfan Fusha(PDK), Gani Dreshaj(AAK), Gazmend Abrashi(AAK), Shaip Muja(PDK), Ibrahim Selimaj(LDK) dhe Zef Morina(LDK). /Botapress