Bislimi takon emisarin gjerman, ia bën të qartë se masat e BE-së janë të padrejta dhe që duhet të hiqen sa më parë

Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, i shoqëruar nga zëvendësministri i Punëve të Jashtme dhe Diasporës, Kreshnik Ahmeti, mirëpriti në takim emisarin e Gjermanisë për Ballkanin Perëndimor, Manuel Sarrazin.

“Republika e Kosovës i çmon dhe vlerëson lart partneritetin, bashkëpunimin dhe miqësinë e ngushtë me Gjermaninë”, thuhet në njoftimin e Zyrës së Kryeministrit, shkruan Zeri.info.

Sipas njoftimit, palët diskutuan mbi situatën në vend dhe rajon dhe zhvillimet e fundit politike.

“Një prej temave të adresuara ishte edhe masat ndëshkuese ndaj Kosovës, ku zëvendëskryeministri Bislimi theksoi se ato vijojnë të jenë të padrejta dhe se duhet të hiqen sa më parë”, theksohet në komunikatë.

Zëvendëskryeministri Bislimi e falënderoi emisarin Sarrazin për përkushtimin, angazhimin e tij të vazhdueshëm e intensiv dhe për këtë vizitë të radhës në vendin tonë. /Zëri