Bislimi ofron projekte konkrete për Pogragjën

Gjilan – Bislimi pati një vizitë shumë miqësore edhe në fshatin Pogragjë. Avdi Haziri, nikoqir i takimit, duke falënderuar Bislimin për prezencën e tij, theksoi se Pogragja është lënë pas dore nga pushtet lokale të deritanishme dhe numëroi një sërë projektesh të lëna në gjysmë ose të parealizuara fare.

Në fjalimin e tij para dhjetëra të pranishmëve, Bislimi u fokusua në pjesën e programit të tij qeverisës që ka të bëjë me hallet e banorëve të Pogragjës.

Ai theksoi përkushtimin e tij që kundërmimi i ujërave të zeza që tani e katërmbëdhjetë vjet pas luftës ende po diskutohet, kurrë më nuk do të diskutohet pas qeverisjes së tij.

Bislimi po ashtu shtoi se projekte tjera që do të realizohen në këtë fshatë janë edhe rivitalizimi i shtëpisë së kulturës, renovimi i ambulancës, si dhe funksionalizimi i sistemit të ujësjellësit ashtu që banorët të kenë ujë të pijshëm në shtëpitë e tyre. “Përveç këtyre projekteve që janë nevoja imediate për Pogragjën, ne do të fokusohemi edhe në krijimin e klimës për zhvillim kulturor këtu duke ndërtuar një amfiteatër veror tek Kalaja e Pogragjës,” shtoi Bislimi.

Banorët e Pogragjës shprehën përkrahjen e tyre të pa rezerve për një kryetar të komunës që është në shërbim të qytetarëve, dhe i premtuan Bislimit mbështetje në zgjedhjet e 3 nëntorit. /rajonipress/