Bislimi: Masat e BE-së kanë pasur efekt në Raportin e Progresit për Kosovën

Zëvendëskryeministri Besnik Bislimi në debatin parlamentar për Raportin e Komisionit Evropian për Kosovën, ka thënë se masat e vendosura nga Bashkimi Evropian kanë pasur efekt në përpilimin e këtij raporti dhe vlerësimin që i është bërë Kosovës.

Sipas tij, masat që janë në fuqi bien ndesh me përpjekjet e rajonit për integrim të përshpejtuar në BE.

Ai tutje ka thënë se Kosova ka bërë hapat e duhur, prandaj “është e rëndësishme që BE-ja sa më shpejt t’i heqë këto masa, të cilat janë të kthyeshme dhe pa pasoja”.

“Ne e përkrahim pakon për zgjerimin e Ballkanit Perëndimor në BE. Nuk duhet të ketë fonde e përfitime pa i përqafuar vlerat e BE-së. Ne besojmë se masat në fuqi kanë pasur efekt në raport. Është e rëndësishme që BE-ja t’i heq këto masa”, ka thënë Bislimi.

Sipas tij, Raporti e përgëzon Kosovë për politikën e jashtme për vendosjen e sanksioneve ndaj Rusisë.

“Kosova është lavdëruar edhe për bashkëpunimin rajonal”, ka shtuar zëvendëskryeministri. /Telegrafi/