Bisedime të fshehta në Bruksel

Ekipi teknik kosovar që e përfaqëson Kosovën në dialogun me Serbinë i udhëhequr nga zëvendëskryeministrja Edita Tahiri, sipas të gjitha gjasave po merr pjesë në një raund të ri bisedimesh, ndonëse për këtë nuk ka kurrfarë njoftimi zyrtar.

Këshilltari politik i zëvendëskryeministres Tahiri, Visar Xani e ka konfirmuar se është në Bruksel, duke marrë pjesë në një takim, por nuk e ka thënë nëse fjala është për një raund të ri bisedimesh teknike me Serbinë.

Medita serbe kanë raportuar se Kosova dhe Serbia do të takohen pasditen e se premtes në Bruksel, ndërsa zgjedhjet lokale të Kosovës janë në fokus të takimit.

Zgjedhjet lokale në Kosovë do të mbahen me 3 nëntor, si rezultat i marrëveshjes së arritur kohë më parë në Bruksel, mirëpo nuk është e qartë nëse ende ka diçka të padefinuar për këto zgjedhje.

Zyrtarisht dihet që janë mbi 14 mijë ankesa të serbëve që jetojnë jashtë Kosovës drejtuar PZAP-së, pasi kërkesa e tyre që të pranohen si votues për zgjedhjet lokale ishte hedhur poshtë.

Nuk është e qartë nëse kjo do të diskutohet në Bruksel sot, mirëpo pjesëtarë të KQZ-së i kanë thënë “Zërit” të enjten se ata po përballen me presion shumë të madh nga OSBE-ja që t’i pranojnë si të drejta këto ankesa. /Zëri/