Bill Clinton kandidat për çmimin Nobel

Një numër rekord prej 259 kandidatësh janë në garë për çmimin Nobel për Paqe në vitin 2013, ka njoftuar Instituti i Nobelit në Oslo. Në mesin e kandidatëve është edhe ish-presidenti i SHBA-së, Bill Clinton.

Për çmimin që do të ndahet në tetor kanë kandiduar 209 individë dhe 50 organizata. Drejtori i Institutit Nobel, Geir Lundestad, theksoi se tendenca që pothuajse çdo vit të ketë një numër më të madh të kandidatëve dëshmon për atë se çfarë interesimi mbretëron në botë për këtë çmim.

Rekordi paraprak është shënuar në vitin 2011, me gjithsej 241 kandidat.

Lista e kandidatëve për çmimin Nobel mbahet e fshehtë, por propozuesit kanë të drejtë të publikojnë emrin e kandidatëve të tyre.

Këtë vit në mesin e kandidatëve më të njohur janë adoleshentja nga Pakistani, Malala, organizatat evropiane për mbrojtjen e të drejtave të njeriut, ish-presidenti i SHBA-së, Bill Clinton dhe udhëheqësi i Burmës, Tein Sein.