Bie Vala

Postë-Telekomi i Kosovës (PTK) po e përjeton rënien më të madhe në tregun e telefonisë mobile. Kjo ndërmarrje vitin që lëmë pas e ka përmbyllur me 65.81 për qind të pjesëmarrjes në tregun e telefonisë mobile që njëherësh është rënia më e madhe. Kjo rënie e kësaj kompanie ka rritur konkurrentin e saj, IPKO-n.

IPKO ka arritur që të marrë 28.65 të tregut të telefonisë mobile që njëherësh është një nga rritjet më të mëdha të kësaj ndërmarrjeje. Punët hiç më keq në avancimin e tregut të telefonisë mobile nuk i ka pas as Z-Mobile e cila ka arritur të mbulojë 5.50 për qind të tregut, gjë që ka arritur të jetë konkurrent i fortë i PTK-së.

Sipas raportit të Autoritetit Rregullativ të Komunikimeve Elektronike dhe Postare (ARKEP), të hyrat nga telefonia mobile kanë arritur në 171.93 milionë euro. “Këto të hyra shënojnë një rënie prej rreth 8.9% në krahasim me vitin paraprak, kur të ardhurat ishin rreth 188.2 milionë euro, përkatësisht rënie prej 14% në krahasim me vitin 2011”, thuhet në raport.