Biasi: Vit i mirë për kombëtaren e Shqipërisë
Gianni de Biasi vitin 2012 e ka vlerësuar si të suksesshëm për Kombëtaren e Shqipërisë. Strategu italian ka pohuar se gjatë këtij viti ekipi kuq e zi ka shënuar progres, andaj atë e ka notuar me 7-she. Ai është optimist se në vitin e ardhshëm Shqipëria do të përparojë edhe më shumë.
Për dallim prej viteve të kaluara, gjatë vitit 2012 Shqipëria e ka pasur një përfaqësuese dukshëm më të fortë. Kështu ka vlerësuar para disa ditëve kryetari i Federatës Shqiptare të Futbollit (FSHF), Armando Duka, i cili për këtë vit ekipin kuq e zi e kishte notuar me 10-she.
Ndërsa, edhe selektori i kuqezinjve, Gianni de Biasi, thotë se gjatë vitit që po e lëmë pas Kombëtarja e Shqipërisë ka shënuar progres të theksueshëm. Mirëpo, ai nuk e ekzagjeron. Strategu italian ekipit të tij për vitin 2012 ia ka dhënë një notë të mirë, 7-she.
De Biasi i ka lavdëruar futbollistët e ekipit të tij për kontributin e madh që po e japin në ngjyrat e fanellave kuq e zi.
“Konsideroj se nota 7 është tamam, edhe atë për shkak të vullnetit shumë të madh që e kanë për punë djelmoshat e ekipit”, ka deklaruar tekniku italian në ‘Procesin Sportiv’.
Ai ka folur fjalë të mira për ekipin kombëtar shqiptar, për të cilin ka thënë se ka të ardhme të ndritur.
De Biasi është i kënaqur me rezultatet e arritura deri më tani me kuqezinjtë, ndonëse ka pranuar se në kuadër të kualifikimeve për botërorin ‘Brazili 2014’ ekipi i tij ka mundur të fitojë më shumë pikë.
Nën udhëheqjen e tij, kuqezinjtë i kanë fituar gjashtë pikë në kuadër të kualifikimeve falë fitoreve ndaj Sllovenisë e Qipros, derisa i kanë pësuar dy humbje – një nga Zvicra, kurse tjetrën nga Islanda në Tiranë, gjë që nuk ishte pritur.
Si përzgjedhës i Shqipërisë, De Biasi ka treguar se kujt ka vendos t’ia japë votën për çmimin e futbollistit më të mirë në botë për vitin 2012. “Për mua Iniesta është më i miri, por vota shkon te Messi”, ka theksuar ai.(express)