Betim Bunjaku, kandidat për ekzekutivin e qytetit Rapperswil-Jona

Ai kandidon si politikan pa parti ndërsa përveç tij kandidaturat i kanë paraqitur edhe dy politikanë ndërkohë që priten edhe dy të tjerë.

Betim Bunjaku, i riu 27 vjeçar i cili kishte kandiduar edhe për asamblenë e Komunës Rapperswil-Jona, ka paraqitur së fundi kandidaturën për vendin bosh në ekzekutivin e qytetit të përmendur. Ky vend ka mbetur i zbrazët pas zgjedhjes së Martin Stöckling nga FDP, kryetar të qytetit.

Këshilli i Qytetit ose ekzekutivi ka 7 anëtarë. Zgjedhjet mbahen më 19 mars.

Ai kandidon si politikan pa parti ndërsa përveç tij kandidaturat i kanë paraqitur edhe dy politikanë ndërkohë që priten edhe dy të tjerë. Nga Liberalët e Gjelbër (GLP) kandidon Nils Rickert, i cili më parë ka qenë këshilltar kantonal i St. Gallenit ndërsa nga CVP, Ueli Dobler. Priten të bëhen publike së shpejti nominimet edhe nga dy partitë tjera: SP dhe liberalët e rinj.

Bunjaku është rritur Rapperswil-Jona, në këtë qytet buzë Liqenit të Cyrihut. Ai ka një diplomë bachelor në ekonomi, nga Universiteti i St. Gallenit ku së shpejti do të marrë edhe masterin.

Betimi ka marrë guximin për të kandiduar pasi që në dy sfidat që i ka pasur deri tash për asamble, ka arritur të shtonte në mënyrë mjaft impresive përqindjen e votave, shkruan südostschweiz. Në zgjedhjet e para ai ka fituar 8 për qind ndërsa në të dytat, 17 për qind.

Ai thotë se demokracia në qytetin e tij aktualisht ndoedhet në një gjendje dëshpëruese, gjë që ia shton atij motivi për të kandiduar.

Si pjesë e ekzekutivit, Bunjaku do të angazhohet për atë që ekonomia dhe shoqëria të pergatiten për ardhmërinë, transmeton albinfo.ch. Ekonomia, sipas tij po ndryshon me digjitalizimin në rritje, gjë që po e bën popullatën më të pasigurt. Prandaj politika duhet të marrë mbi vete përgjegjësinë dhe këtë zhvillim ta trajtojë si shans, thotë ai veç tjerash.

http://www.albinfo.ch/betim-bunjaku-kandidat-per-ekzekutivin-e-qytetit-rapperswil-jona/