Besojnë në PDK, prandaj i bashkohen asaj

Gjilan – Orhan Bejta është shprehur se shkollimi dhe punësimi janë brenga më e madhe me të cilat preokupohet kjo kategori dhe tani duke qenë pjesë e PDK-së pret që të punohet në këtë drejtim për të mos mbetur anash kjo kategori.

Sot Partisë Demokratike të Kosovës në Gjilan iu bashkuan mbi 100 qytetarë, anëtarë nga Shoqata e Shurdhmemecëve në Gjilan, të bindur se po i bashkohen një subjekti të cilës po i besojnë dhe me të cilën do ti realizojnë interesat e tyre si kategori shoqërore.

Në ceremoninë e dorëzimit të librezave të PDK-së, Izmi Zeka, kryetar i Degës tha se PDK ndihet e privilegjuar se në mesin e saj tani ka edhe mbi 100 qytetarët të tjerë, anëtarë të shoqatës së shurdhmemecëve.

Ai u tha atyre se do të jenë pjesë e barabartë e PDK-së dhe bashkërisht do të angazhohen për të krijuar një gjendje stabile ekonomike për familjet e tyre duke i ditur nevojat. Kryetari Zeka tha se kjo kategori e cila ka nevojë për përkrahje, do ta ketë mbështetjen e partisë, por edhe të institucioneve.

Zeka u ka premtuar atyre vende edhe në strukturat udhëheqëse të partisë si një mundësi më e mirë për të punuar në integrimin e tyre të plotë në shoqëri, si të barabartë.

Ndërsa, Shpresa Sejdiu përfaqësuese e kësaj organizate ka falënderuar PDK-në për përkrahje duke thënë se të qenit tani edhe pjesë e PDK-së, krijon mundësi për angazhime më të mëdha për këtë kategori. Ajo tha se këta anëtarë të kësaj shoqate që po aderojnë në PDK po i besojnë këtij subjekti që e vlerësojnë si një subjekt të fuqishëm dhe se e ardhmja është me të.

Me këtë rast edhe Fahredin Sejdiu, tha se pret tani punë të përbashkët për t’u realizuar nevojat e shumta të anëtarëve të kësaj shoqate, duke veçuar nevojën për integrim dhe punësim

Ai ka kërkuar që kujdesi ndaj kësaj kategorie të jetë më i madh sepse nevojat janë të mëdha.

Edhe Orhan Bejta është shprehur se shkollimi dhe punësimi janë brenga më e madhe me të cilat preokupohet kjo kategori dhe tani duke qenë pjesë e PDK-së pret që të punohet në këtë drejtim për të mos mbetur anash kjo kategori. Edhe anëtarë të tjerë nga kjo shoqatë kanë folur për hallet e tyre, duke prezantuar para kryetari të degës së PDK-së, nevojat e tyre dhe duke u shprehur të kënaqur që iu bashkuan një subjekti politik, të cilën e vlerësojnë lartë dhe me të cilën presin të punojnë bashkërisht për realizimin e interesave të tyre. /rajonipress/