Besnikut me familje i lejohet qëndrimi në Gjermani

Besnik Hasanaj tash mund ta fillojë mësimin e zanatit në një firmë në Bad Säckingen. Njëkohësisht edhe familja e tij do të vazhdojë qëndrimin në Gjermani.

Në Oberes Wiesental (Landi Baden Württemberg) për tri raste refugjatësh të cilëve u ishte refuzuar ndjekja e mësimit për zanat, është gjetur një zgjidhje, së paku e përkohshme. Në mesin e tyre është edhe shqiptari Besnik Hasanaj, shkruan “Badische Zeitung”.

Ai ka marrë javën e kaluar lejen për të vazhduar mësimin e zanatit. Për të ardhur deri këtu, kujdestarët socialë të Caritasit kanë bërë presion në shumë kanale, kështu që në fund qeveria në Karlsruhe e dha lejen.

Besniku tash mund ta fillojë mësimin e zanatit të ngjyrosjes së automobilave në një firmë në Bad Säckingen, transmeton albinfo.ch. Njëkohësisht edhe familja e tij do të ketë të drejtë të vazhdojë qëndrimin në Gjermani, gjegjësisht në Schönau ku është duke jetuar tash.