Besnik Tahiri pas deklaratës së Trump: Koha me u kfjell Kosova

Ish-deputeti i AAK-së, Besnik Tahiri, ka reaguar pas një deklarate të ish-presidentit amerikan, Donald Trump, i cili në një postim të fundit përmendi një marrëveshje të shpejtë mes Izraelit dhe Iranit, duke e lidhur atë me marrëveshjen Kosovë–Serbi të arritur gjatë mandatit të tij të parë.

Tahiri e cilëson këtë deklaratë si një sinjal që Kosova duhet ta lexojë me kujdes, sidomos në një kohë kur bota përballet me konflikte serioze.

“Presidenti Trump sot foli qartë për një marrëveshje të shpejtë mes Izraelit dhe Iranit, ndërsa në të njëjtin postim përmendi edhe marrëveshjen Kosovë–Serbi. Në këtë kohë që në botë po ndodhin luftëra, Kosova duhet të jetë shumë e kujdesshme”, shkroi Tahiri në një reagim në Facebook.

Ai thekson tri pika që, sipas tij, duhet të udhëheqin klasën politike kosovare:

Liria dhe Pavarësia janë arritjet më të mëdha të kombit shqiptar dhe çdo “marrëveshje” e ardhshme duhet të jetë në përputhje me interesin kombëtar.

Përfaqësimi dinjitoz dhe serioz është thelbësor për vendin, larg interesave të ngushta partiake apo personale.

Vendimmarrja transparente duhet të jetë rregull, jo përjashtim – pa arrogancë dhe pa dyer të mbyllura, siç ka ndodhur në të kaluarën.

Në fund, Tahiri thekson se situata kërkon kthjellim dhe mobilizim institucional: “Koha me u kfjell. Koha me u përbë Kuvendi!”, ka deklaruar ai.