Besart Berisha vazhdon të shkëlqejë në Australi

Adelaide – Besart Berisha po vazhdon të shkëlqejë në kampionatin e Australisë në futboll. Sulmuesi kosovar të premten realizoi dy gola për skuadrën e tij Brisbane Roar, e cila fitoi 2:1 në udhëtim kundër Adelaide Unitedit, në kuadër të javës së nëntë. Brisbane ka shtatë fitore e dy humbje dhe i prin klasifikimit me 21 pikë, kurse Berisha ka shënuar pesë gola në pesë paraqitjet që ka pasur deri më tash.

Berisha kampionatin e hapi me gol, ndërsa në ndeshjen e dytë u zëvendësua në minutën e 25-të pas një lëndimi.

Ai më pas mungoi në katër ndeshje, ndërsa u kthye me gol në xhiron e shtatë.

Një gol e realizoi edhe në xhiron e tetë dhe me këtë formë vazhdoi edhe të premten. Edhe pse mungoi në katër ndeshje, Berisha është realizatori i dytë më i mirë në ligë.