RCCOLA

Bersant Celina: Çfarë triumfi madhështor!

/ 2 minuta lexim

Ylli i Kosovës Bersant Celina e ka quajtur madhështore fitoren e skuadrës së tij Swansea City 1-0 ndaj Sheffield Unitedit të shtunën në Championship, në luftë për t’u rikthyer në Premierligë.

Mesfushori i Kosovës, Bersant Celina dha kontributin e tij që Swansea City t’i fitojë tri pikë të shtunën në Championship – nivelin e dytë të futbollit anglez – duke luajtur rol të rëndësishëm në fitoren minimale 1-0 ndaj skuadrës në formë të lartë, Sheffield Unitedit, që renditet i treti, shkruan Gazeta Express.

22-vjeçari ishte titullar si përherë edhe në ndeshjen e së shtunës, dhe i falënderoi tifozët derisa shtoi se skuadra punoi fortë për këtë fitore. Ai u vlëresua me notën shtatë (7) nga Sky Sports.

“Fitore madhështore sot. Skuadra punoi zellshëm për ta arritur atë. Faleminderit tifozëve”, shkroi Celina në llogarinë e vet zyrtare në Instagram.

Mobi Casa

Swansea është duke luftuar për një vend në play-off për t’u rikthyer në Premierligë dhe tani renditet e 9-a me 40 pikë.

Skuadra e Celinës tash ngel vetëm gjashtë pikë larg pozitës së gjashtë, të fundit që siguron një vend në play-off.

Kosovari i lindur në Prizren i ka shënuar katër gola dhe i ka bërë katër asistime në 25 ndeshje deri tani këtë sezon për Swansea. /Gazeta Express/