Berisha: Me Ballin Kombëtar Gjilani dhe Anamorava do të frymojë më lirshëm

Gjilan – Balli Kombëtar dega në Gjilan ka mbajtur tubimin e saj të parë zgjedhor ku ka prezantuar 8 kandidatët e saj për këshilltar komunal. Selman Berisha kryetar i Ballit Kombëtar tha se fillimisht do të futemi nëpër komuna pastaj edhe në Parlament për të shtrirë aktivitetin edhe në Sanxhak e gjetiu.

Balli Kombëtar dega në Gjilan e ka mbajtur tubimin e saj të parë zgjedhor ku ka prezantuar kandidatët e saj për këshilltar komunal.

Xhemajl Murati Tupalla sekretar i këtij subjekti politik tha se ka shumë arsye që duhet të votohet Balli Kombëtar.”Këta pushtetar asnjëherë nuk punuan për shtet, por vetëm për pushtet. Këta pushtetar kanë shikuar vetëm interesat e tyre të ngushta personale e klanore. Andaj duhet ta ndëshkojmë këtë keqqeverisje për të ardhur në udhëheqje njerëz të ndershëm e profesionist” tha Tupalla, raporton rajonipress.

Edhe Selman Berisha kryetar i Ballit Kombëtar në nivel vendi tha se fillimisht pretendojnë të fitojnë disa komuna e pastaj do të futen edhe në Parlament e Qeveri.”Me Ballin Kombëtar Gjilani e Anamorava do të frymojnë më lirshëm. Gjilani ka dhënë mbi 8 mijë viktima dhe meriton ta ketë një parti serioze dhe të përkushtuar e cila do të përfaqësojë denjësisht interesat e tyre. Nëse votoni Ballin Kombëtar ju do të nderoni stërgjyshërit tuaj” ishte porosia e Berishës./rajonipress/