Berisha kuqezi

Ilir Berisha (22) mund të debutojë në fanellën e kombëtares së Shqipërisë në ndeshjen kundër Norvegjisë, e cila zhvillohet në kuadër të kualifikimeve për botërorin “Brazili 2014”. Sipas të gjitha gjasave, qendërmbrojtësi kosovar do të ftohet për takimin e rëndësishëm me “vikingët”.

Lajmin është publikuar nga ana e Federatës Shqiptare të Futbollit dhe mediet shqiptare. Futbollisti që aktivizohet tek skuadra e Orebros në Suedi është i pari në listën e preferencave të selektorit Gianni De Biasi, transmeton Panorama.

Ish-futbollisti i Prishtinës pritet të pajiset me pasaportë shqiptare shumë shpejt. “Kanë nisur procedurat për ta pajisur me pasaportë shqiptare futbollistin Ilir Berisha që aktivizohet në Kategorinë e dytë suedeze”, ka deklaruar përgjegjësi i zyrës për shtyp pranë FSHF-ës, Lirim Zalla.