Berisha e do Atalantan dhe Evropën

Etrit Berisha e kaloi ndoshta sezonin më të mirë në karrierë. Portieri kosovar e gjeti formën ideale tek Atalanta këtë edicion, ku është huazuar nga Lazio.

Ai e fitoi vazhdimësinë, e cila i mungonte në kryeqytetin italian dhe demonstroi se është një portier i niveleve të larta, raporton zeri.info.

Prandaj, portieri prishtinas shpreson të vazhdojë të qëndrojë në ekipin nga Bergamo, ku po ia kalon për mrekulli.

“Unë e kam thënë gjithmonë dhe vazhdoj ta përsëris se këtu po ia kaloj mirë, më pëlqen si qyteti ashtu edhe klubi, kryesia më bën të ndihem i qetë. Do më pëlqente të qëndroj këtu. Në fund të sezonit, menaxheri im dhe Lazio do ta marrin vendimin më të mirë”, ka thënë përfaqësuesi shqiptar për mediat italiane.

Gjithashtu, ai i ka treguar edhe objektivat e këtij sezoni me Atalantan, me të cilën synon të kualifikohet në garat evropiane, respektivisht në Europa League.

“Ndeshja me Milanin do të jetë më e rëndësishmja, por edhe më e vështira. Vendi i katërt thuajse na ka ikur, objektiv është i pesti. Duam dhe dëshirojmë ta arrijmë këtë pozitë, edhe pse të shtunën do të jetë vështirë”, ka përfunduar Berisha. /Zëri/