Futbollisti kosovar është i vendosur t’i bëjë për vete tifozët e Lazios në sezonin e ri
Valon Berisha e ka lënë prapa krahëve lëndimin, i cili e kishte lënë jashtë fushës së blertë për disa muaj.
Futbollisti kosovar i është bashkuar ekipit të Lazios ditë më parë dhe duket shumë entuziast për t’i treguar vlerat e tij.
Sezoni i tij i parë tek Biancocelesti ishte i zbehtë pasi nuk e lanë rehat lëndimet, që ia dedikuan formën në rënie.
Mirëpo, përfaqësuesi kosovar është i vendosur që në sezonin e ri t’ju tregojë të gjithëve se sa vlen.
T’i tregojë edhe Lazios se nuk gaboi që e bleu nga Red Bull Salzburg vitin e kaluar për 7,5 milionë euro.
“Do t’i bëj tifozët të më duan. E ndiej besimin e klubit. Do të luftoj si një luan për t’i rrëmbyer zemrat e tifozëve”, ka thënë futbollisti i lindur dhe rritur në Norvegji.
Berisha e ka kaluar periudhën e errët dhe tash i është rikthyer buzëqeshja.
Ai pritet të jetë gati për ndeshjet kampionale në Serie A gjatë muajit shtator.
Sipas të gjitha gjasave, njëjtë si në muajin mars dhe atë qershor, mesfushori luftarak nuk do të jetë në dispozicion të Përfaqësueses së Kosovës as në ndeshjet e shtatorit, ndaj Republikës Çeke dhe Anglisë.
Sidoqoftë, Berishën mund ta shohim nën urdhrat e trajnerit Bernard Challandes në ndeshjet e tetorit, në kuadër të kualifikimeve të Evropianit 2020. /Gazeta Express/
