Berisha, Dacicit: Krahasimi i luftëtarëve, me terroristët e Al Qaeda-s shprehje e albanofobisë

Kryeministri Sali Berisha i është kundërpërgjigjur deklaratave të kryeministrit serb, duke thënë se serbët kanë frikë nga “Shqipëria e Madhe”. Kryeministrit të Serbisë, Ivica Dacic kërkoi heqjen e përmendores së heronjve të Preshevës, pasi i krahasoi ata me terroristët e Al Qaeda-s.

Sipas kryeministrit Sali Berishës, krahasimi i Dacicit për shqiptarët me terroristët e Al Qaeda-s është një shprehje e radhës e albanofobisë pa të ardhme që dominon në Beograd.

Reagimi është bërë në profilin e kryeministrit në “Facebook”, ku Berisha thekson se ata ranë për lirinë e shqiptarëve të Luginës se Preshevës.

“Pyetjes për arsyet e heqjes së përmendores së heronjve të Preshevës, kryeministri i Serbisë iu përgjigj në Shkup se ata ishin terroriste dhe shtroi pyetjen retorike: “A do të lejonin SHBA-të të vendosej në New York një përmendore e terroristeve të Al Qaeda-s?”, shkruan Berisha.

Ai thotë se luftëtarët e lirisë ranë për lirinë e qytetarëve shqiptarë të Luginës së Preshevës që përjetonin shtypjen më të egër nga regjimi i Milloshevqit. “Ata me luftën e tyre të drejtë imponuan një marrëveshje me ndërmjetësim ndërkombëtar me autoritetet e Beogradit për më shumw liri, të drejta dhe autonomi për shqiptarwt e Luginës së Preshevës, si dhe shpejtuan fundin e regjimit të Millosheviqit dhe në një farë mënyrë edhe çlirimin e popullit serb nga regjimi i tij. Krahasimi i tyre me terroristët e Al Qaeda-s është një shprehje e radhës e albanofobisë pa të ardhme që dominon ne Beograd. Të rënët tanë nuk vdesin kurrë! – sb”, shkruan Berisha në Facebook. /Telegrafi/