Berisha: Burgimi i Haradinajt, politik

Kryetari i Aleancës për Ardhmërinë e Kosovës Ramush Haradinaj po zhvillon një vizitë në Tiranë, vetëm pak ditë pas lirimit nga Gjykata e Hagës, e cila e shpalli atë të pafajshëm.

Në një konferencë të përbashkët të Haradinajt me Kryeministrin Sali Berisha, ky i fundit e konsideroi vizitën si një ngjarje të rëndësishme në 100-vjetorin e krijimit të shtetit shqiptar, sikurse theksoi se vendimi i Gjykatës së Hagës ishte një lajm shumë i mirë për të gjithë ne, transmeton TCH.

“Shpreh nderimin më të madh për zotin Haradinaj, i bëri shqiptarët të mbajnë kokën lart, duke lënë detyrën e Kryeministrit dhe u paraqit për gjykim në Hagë. Nderimin më të madh për këtë gjykatë e cila nuk pranoi ndikimet dhe interferencat politike të gatuara në korridoret dhe skutat e diplomacisë. Shpalli dy herë me radhë pafajësinë e plotë, si të paqena akuzat absurde për të cilat zoti Haradinaj u detyrua të paraqitej para gjykatës. Ky vendim është një nder dhe dinjitet për vetë Gjykatën e Hagës, për të cilën Shqipëria ka vlerësimin më të madh”, deklaroi Berisha.

Sipas tij Ramush Haradinaj u angazhua me përkushtim të jashtëzakonshëm për rindërtimin e marrëdhënieve ndëretnike në Kosovë, duke theksuar se luajti rol thelbësor në lirinë e Kosovës.

Nga ana e tij zoti Haradinaj shprehu mirënjohje për vlerësimin e bërë nga Kryeministri Berisha dhe populli shqiptar, duke u dalë në bashkëpunim mes dy vendeve.

Shpërndaje.
© RAJONIPRESS