Bekim Rexhepi: Derbin e zhvillojmë pa ngarkesë, do të luajmë për fitore

Gjilan – Kryetari i KF Gjilanit Bekim Rexhepi para derbit të madh të qytetit të Gjilanit, ka bërë të ditur se do të zhvillohet një derbi si zakonisht ndërsa nga futbollistët e tij kërkon fitore.

Në taborin e “bardh e kuqëve” të Gjilanit para kësaj sfide të madhe futbollistike e cila zhvillohet të dielën në stadiumin e qytetit në Gjilan gjithçka është e qetë, ata këtë ndeshje e kanë marrë si ndeshjet e zakonshme për gjatë tërë edicionit të garave të Supërligës së Kosovës në futboll.

Siç dihet të dielën do të zhvillohet java e fundit e Superligës së Kosovës në futboll, ndërsa fati ka bërë që dy rivalët më të mëdhenj të futbollit të Kosovës të takohen në përmbyllje të edicionit të garave.

“Për skuadrën e Gjilanit ky derbi është si të gjithë derbit tjerë, nuk jemi nën presion të rezultatit pasi ne gjendemi në mesin e tabelës, por do të zhvillojmë ndeshje të fortë dhe kërkojmë fitore dhe të përfundojmë këtë edicion të garave me fitore”, thotë numri një i KF Gjilanit, Bekim Rexhepi.

Edhe pse rivalit të Gjilanit, Dritës i duhen pikët si asnjë herë më parë për Rexhepin kjo nuk ka rëndësi.”Ne do ti qasemi ndeshjes për të ngadhënjyer ndaj rivalit tonë, neve nuk na intereson se kujt i duhen pikët ne nuk jemi skuadër e manipulimeve dhe asnjë herë nuk kemi qenë e pazarllëqeve të skuadrave ky është një derbi i veçantë dhe ne nuk do të humbim prestigjin e rivalitetit në fushën e blertë”, ka bërë të ditur Rexhepi.

Skuadra e Dritës në këtë ndeshje kërkon pikët e mbijetesës pasi janë disa rezultate të mundshme në javën e fundit të Superligës së Kosovës.

“Neve si klub nuk na intereson se kush me kë luan dhe a i duhen kësaj skuadre apo tjetrës pikët e shpëtimit apo të barazhit, ne do të zhvillojmë ndeshjen pa kalkulime le të fiton më i miri, kjo është bukuria e futbollit dhe derbit Gjilanas,” shprehet Rexhepi.

Në të kundërtën skuadra e Gjilanit është duke u përgatitur maksimalisht për ballafaqimin e Derbit për të dielën.
“Ne do të japim gjithçka nga vetja do të paraqitemi me formacion standard, dëshiroj të jetë spektakël i futbollit si në derbit e mëparshëm por i porosis rivalët se skuadra e Gjilanit nuk ka pikë për t`ju dhënë, në qoftë se jeni më të mirë tregohuni gjatë 90 minutave dhe do t`ju shtrim dorën në mënyrë sportive”, thekson Rexhepi.

Peshë të madhe në javën e fundit kanë dy ballafaqime ajo e derbit në mes Drita-Gjilani dhe ndeshja me peshë të madhe në mes Drenica-Istogu të gjitha ndeshjet zhvillohen të dielën duke filluar në ora 15:00./rajonipress/