Behgjet Pacolli uron 4 Korrikun: SHBA-ja mbetet aleati më i madh i Kosovës dhe garant i vlerave demokratike

Me rastin e 4 Korrikut – Ditës së Pavarësisë së Shteteve të Bashkuara të Amerikës, ish-presidenti dhe lideri i AKR-së, Behgjet Pacolli, ka përcjellë një mesazh urimi për popullin amerikan, duke vlerësuar rolin historik të SHBA-së në mbrojtjen e lirisë, demokracisë dhe paqes në botë.

Në reagimin e tij, Pacolli thekson se 4 Korriku përfaqëson lindjen e një kombi të ndërtuar mbi idealet e lirisë, sundimit të ligjit dhe respektit për dinjitetin njerëzor, vlera që, sipas tij, kanë frymëzuar popujt në mbarë botën dhe kanë ndikuar në zhvillimin e rendit demokratik ndërkombëtar.

Ai shpreh gjithashtu mirënjohjen e thellë për mbështetjen e vazhdueshme që Shtetet e Bashkuara i kanë dhënë Kosovës dhe popullit shqiptar në momentet më vendimtare të historisë, duke e cilësuar partneritetin me Uashingtonin si një shtyllë të rëndësishme për të ardhmen e vendit.

“Uroj që partneriteti dhe miqësia ndërmjet vendeve dhe popujve tanë të vazhdojnë të forcohen edhe në të ardhmen”, ka shkruar Pacolli në mesazhin e tij, duke uruar popullin amerikan me rastin e festës kombëtare.

Mesazhi i tij vjen në një ditë simbolike për SHBA-në, ndërsa personalitete të shumta politike në Kosovë kanë shprehur mirënjohje dhe vlerësim për aleatin strategjik të vendit./rajonipress/