Behgjet Pacolli: Kurrë me Hashim Thaçin, kurrë me Isa Mustafën

Ai ka thënë se që nga tani, AKR’ja konfirmon se pas zgjedhjeve të ardhshme nuk do të hyjë në koalicion me Partinë Demokratike të Kosovës, për shkak eksperiencës së tij në të kaluarën me këtë parti.

Sonte në emisionin “Komiteti Qendror” – drejtuar nga Berat Buzhala, Leonard Kerquki dhe Shpend Limoni – prodhim i Gazetës Express për RTV Dukagjinin, kreu i Aleancës Kosova e Re, Behgjet Pacolli, ka folur për mundësinë e bashkëpunimit të AKR’së me partitë tjera, pas zgjedhjeve të ardhshme.
Ai ka thënë se që nga tani, AKR’ja konfirmon se pas zgjedhjeve të ardhshme nuk do të hyjë në koalicion me Partinë Demokratike të Kosovës, për shkak eksperiencës së tij në të kaluarën me këtë parti.

Pacolli ka treguar se edhe Lidhja Demokratike e Kosovës, përgjatë kohës që udhëhiqet nga Isa Mustafa, ka vijë të kuqe nga AKR’ja.

Ish-presidenti i Kosovës ka shtuar se LDK’ja, me njerëzit që ka në krye të saj, kurrë nuk do të mund të ketë bashkëpunim me të dhe partinë e tij, edhe pse, sipas Pacollit, LDK dhe AKR kanë platforma të ngjashme politike.

Kreu i AKR’së në “Komiteti Qendror” është shprehur i shqetësuar se pas zgjedhjeve të ardhshme kjo parti nuk mund të gjejë asnjë partner të denjë, me të cilin do të hyjë në koalicion qeverisës.

Sipas Pacollit, AKR’ja po punon për bashkëpunim me njerëz plotësisht të ri në skenën politike, dhe profesionistë në shumë lëmi. /Express/