Behgjet Pacolli: Kërkojmë zbatimin e vendimit të Gjykatës së Lartë dhe lejimin e hyrjes së specialistëve të MABCO-s në Aeroportin e Vlorës

Biznesmeni Behgjet Pacolli ka bërë të ditur se kompania MABCO i është drejtuar sërish Ministrisë së Infrastrukturës dhe Energjisë në Shqipëri, duke kërkuar që specialistëve të kompanisë dhe nënkontraktorëve t’u mundësohet hyrja në terminalin e Aeroportit Ndërkombëtar të Vlorës për përfundimin e punimeve të mbetura dhe nisjen e procesit të certifikimit.

Përmes një postimi publik, Pacolli thekson se kjo kërkesë bëhet në emër të transparencës, duke publikuar edhe letrën zyrtare të dërguar ministrisë.

Ai rikujton se, sipas tij, Gjykata e Lartë e Republikës së Shqipërisë ka konstatuar paligjshmërinë e masave që penguan ushtrimin e të drejtave të MABCO-s, duke rrëzuar vendimet mbi të cilat ishte mbështetur bllokimi i projektit.

Megjithatë, Pacolli pretendon se edhe pas këtij vendimi vazhdon të pengohet hyrja e specialistëve në kantier dhe zbatimi i plotë i vendimit gjyqësor.

Sipas tij, respektimi i ligjit, transparenca dhe zbatimi i vendimeve të gjykatave janë të domosdoshme për përfundimin e këtij investimi strategjik, që, siç shprehet ai, është në interes të qytetarëve dhe të Republikës së Shqipërisë.

Si është e mundur që një investitor me reputacion ndërkombëtar të përballet me pengesa të vazhdueshme në një projekt strategjik për Shqipërinë?

Kjo është pyetja që shtrohet natyrshëm pas zhvillimeve të fundit rreth Aeroportit Ndërkombëtar të Vlorës. Behgjet Pacolli, një biznesmen me përvojë të njohur në projekte të mëdha infrastrukturore në shumë vende të botës, pretendon se, pavarësisht vendimeve të Gjykatës së Lartë, kompania e tij vazhdon të përballet me pengesa administrative që, sipas tij, po vonojnë përfundimin e një investimi me rëndësi kombëtare.

Nëse këto pretendime qëndrojnë, institucionet shqiptare kanë përgjegjësinë të japin sqarime publike dhe të garantojnë zbatimin e ligjit, pasi investimet strategjike kërkojnë siguri juridike, transparencë dhe besim institucional. Në fund, pyetja nuk është vetëm nëse Behgjet Pacolli po trajtohet në mënyrë të drejtë, por edhe çfarë mesazhi i përcillet investitorëve të tjerë që synojnë të investojnë në Shqipëri./rajonipress/