Begzad Sinani përballet me akuzat e EULEX-it

Gjilan – Begzad Sinani ish kryetar i komunës së Kamenicës së bashku me Selami Zylfiun zyrtar certifikues e Hasan Keqmezin ish menaxher i zyrës së prokurimit akuzohen nga ana e EULEX-it për keqpërdorim të detyrës zyrtare , ku në cilësinë e kryetarit Sinani ka kryer shpenzime të reprezentacionit dhe shpenzime tjera pa i zbatuar procedurat e prokurimit. Begzad Sinani thotë për rajonipress se akuzat e EULEX-it kanë qëllim që të dëmtojnë reputacionin e kuadrove të PDK-së.

Begzad Sinani të mërkurën në Gjykatën Themelore të Gjilanit do të përballet me një trup gjykues të EULEX-it që kryesohet nga Anna Adamsak Gallant.

Sinani akuzohet nga Prokuroria Speciale e EULEX-it për keqpërdorim të detyrës zyrtare raporton rajonipress.

Sipas hetimeve që janë nisur duke u bazuar nga një kallëzim penal që ka dorëzuar në ish Prokurorinë e Qarkut në Gjilan , Agjencioni Antikorrupsion, Sinani së bashku me Selami Zylfiun dhe Hasan Keqmezin dyshohen për shpërdorim të detyrës zyrtare.

Sipas kallëzimit penal që ka ngritur Agjencioni Antikorrupsion e që është bazuar kryesisht aktakuza e Prokurorisë Speciale të Kosovës thuhet se Begzad Sinani ka kryer shpenzime të reprezentacionit dhe shpenzime tjera pa i zbatuar procedurat e prokurimit.

Aktakuza është ngritur edhe ndaj Selami Zylfiut zyrtar certifikues dhe Hasan Keqmezi ish menaxher i zyrës së prokurimit.

Edhe Zylfiu e Keqmezi thuhet se kanë zbatuar vendime e pagesa në kundërshtim me rregullat financiare dhe udhëzimet e thesarit. AAK ka paraqitur si prova raportin e auditorit i cili përmban shumë fatura të zbatuara pa zotim paraprak të mjeteve.

Por, Begzad Sinani i kontaktuar nga rajonipress tha se EULEX-i me këtë aktakuzë e cila pos që po zhvillohet në prag të fushatës ku unë jam kandidat për kryetar të Kamenicës synim ka që të dëmtojë reputacionin e kandidatëve të PDK-së. “Pse në këtë kohë ky gjykim, pse në këtë kohë e tërë kjo zhurmë kur rasti është nisur që nga viti 2009” thotë Sinani.

Sinani tha se i ka duart e pastra në këtë lëndë dhe se nesër do të kërkojë shtyrjen e gjykimit sepse nuk ka rrethana për të zhvilluar normalisht procesi gjyqësor.

Ndryshe në këtë proces gjyqësor pritet të dëshmojë edhe Shaip Surdulli si përfaqësues zyrtar nga Kuvendi Komunal i Kamenicës. /rajonipress/