BE: Nuk arsyetohet zvarritja e vendimmarrjes për Specialen

Bashkimi Evropian nuk sheh asnjë arsyetim të qëndrueshëm të institucioneve vendore për ta zvarritur edhe më tutje vendimmarrjen për Gjykatën Speciale. Prandaj, ka bërë thirrje që sa më shpejt ajo të themelohet, shkruan sot Koha Ditore.

Dy javë më parë, me propozim të subjekteve në pushtet, është shtyrë për afat të pacaktuar seanca e Kuvendit që kishte në agjendë shqyrtimin dhe votimin e amendamenteve kushtetuese për Specialen.

Kjo, me arsyen se deputetët nuk e posedonin para vetes edhe Draftligjin për këtë gjykatë, i cili është harmonizuar tashmë me BE-në. Ishte arsyetim formal, ngaqë shtyrja qe bërë në mungesë votash, kurse Draftligji nuk ishte fare në rend dite.

Po kështu, ligjërisht, Draftligji nuk mund të procedohet në Kuvend pa u aprovuar amendamentet.

Kuvendi ka bërë të ditur se të hënën do të mbahet mbledhja e Kryesisë me kryetarët e grupeve parlamentare, e në të cilën do të vendoset për rendin e ditës së seancës së ardhshme plenare. Në pikën që i referohet përgatitjes së seancës, nuk është përfshirë fare vënia në rend dite e amendamenteve kushtetuese për Specialen. Janë 16 pika të rendit të ditës. Asnjëra nuk ka të bëjë me këtë gjykatë.

http://koha.net/?id=27&l=61761