BE: Lajçak foli për gjithçka me Kurtin, është koha që dialogu të përfundojë

Me rastin e 10 vjetorit të fillimit të fillimit të dialogut midis Kosovës dhe Serbisë, i cili ndërmjetësohet nga Bashkimi Evropian, Brukseli vlerëson se procesi gjatë dekadës së mëparshme solli “ndryshime të vërteta” kur bëhet fjalë për jetën e përditshme të njerëzve në rajon.

“Pas 10 vitesh dialog, është koha për të ecur përpara dhe për ta çuar procesin në një fund të suksesshëm”, tha për Tanjug, zëdhënësi i BE-së, Peter Stano, transmeton Gazeta Express.

Stano kujton se përfaqësuesi special i BE-së, Miroslav Ljaçak ishte në Beograd dhe Prishtinë javën e kaluar dhe se ai mori garanci nga të dy palët se ekziston dëshira për të vazhduar përfshirjen në procesin e normalizimit të marrëdhënieve ndërmjet dy vendeve.

“Tani po punojmë intensivisht nga të dy palët për ta arritur një marrëveshje gjithëpërfshirëse për normalizimin e marrëdhënieve. Shtetet anëtare të BE-së po presin që dialogu të vazhdojë sa më shpejt të jetë e mundur dhe ta shohim Beogradin dhe Prishtinën të angazhuar në përfundimin e suksesshëm të këtij procesi sa më shpejt të jetë e mundur”, tha Stano.

Duke komentuar pikëpamjet fituesit të zgjedhjeve të fundit në Kosovë, Albin Kurti, për bashkimin e Kosovës me Shqipërinë, zëdhënësi i BE-së tha se udhëheqësit politikë në rajon, përfshirë institucionet e ardhshme në Prishtinë, pritet të punojnë në ndërtimin e besimit të ndërsjellë dhe në marrëdhënie konstruktive të fqinjësisë së mirë.

Ai shton se gjatë qëndrimit të tij në Prishtinë, përfaqësuesi special i BE-së, Lajçak bisedoi “për gjithçka” me Kurtin.

“Ajo që ne presim është bashkëpunimi më i mirë në rajon dhe intensifikimi i proceseve të brendshme të reformës”, tha Stano.

Ai theksoi se çështja e ndryshimit të kufijve, përfshirë shkëmbimin e territoreve ose ndonjë lloj bashkimi, është “një çështje e mbyllur prej kohësh”.

“Qëllimi kryesor i marrëveshjes midis Beogradit dhe Prishtinës është arritja e një marrëveshje gjithëpërfshirëse, ligjërisht të detyrueshme që mbështet stabilitetin rajonal, është e pranueshme për të dy palët në proces dhe është në përputhje me parimet e BE-së. Të dy palët e dinë se çfarë është e mundshme dhe çfarë nuk është”, tha Stano. /Express/

Shpërndaje.
© RAJONIPRESS