BE ia vazhdon mandatin EULEX-it, Mogherini ia përgatit letrën Thaçit

Bashkimi Evropian ia ka vazhduar sot mandatin misionit të vet në Kosovë për sundim të ligjit, EULEX, ndërkohë që në Prishtinë, gjatë tërë ditës janë duke u mbajtur bisedime për modalitetet e futjes së kësaj çështjeje në agjendën e Kuvendit për miratim.

Maja Kocijançiq, zëdhënëse e Përfaqësueses së Lartë të BE-së Federica Mogherini, ka konfirmuar për KALLXO.com vendimin e marrë sot në Bruksel.

“Këshilli Evropian ka miratuar sot vendimin me të cilin i zgjatet mandati misionit të EULEX-it”, tha Kocijançiq në një përgjigje përmes postës elektronike.

Ky vendim duket se i ka hapur rrugë Mogherinit që t’i përgjigjet Presidentit të Kosovës në letrën e dërguar për vazhdimin e mandatit.

“Përfaqësuesja e Lartë do t’i përgjigjet letrës së Presidentit Thaçi ashtu siç është praktika e vendosur; në ndërkohë ne po vazhdojmë të punojmë me autoritetet e Kosovës për t’i përmbyllur të gjitha përgatitjet për vazhdimin e mandatit të EULEX-it”, tha zëdhënësja Kocijançiq për KALLXO.com.