Bayerni nis të ushtrojë presion mbi Shaqirin

Munchen – Për Xherdan Shaqirin, stërvitja e parë me skuadrën e Bayern Munchenit nuk ishte vetëm një aventurë e re, por edhe një sfidë shumë e vështirë.

Krerët e skuadrës bavareze kërkojnë rezultate të menjëhershme në edicionin e ri, kurse trajneri Jupp Heynckes e ka porositur Shaqirin që të tregojë veten maksimalisht gjatë këtyre stërvitjeve. Heynckes e sheh Shaqirin 20-vjeçar, si një alternativë te Bayerni, pasi nuk beson se mesfushori kosovar mund të sigurojë vendin e titullarit.

“Tri herë kemi përfunduar në pozitën e dytë. Duam të rikthehemi menjëherë në krye dhe qysh në edicionin e ri të fitojmë titullin e kampionit”, ishin fjalët e presidentit të Bayernit, Karl-Heinz Rummenige.

Trajneri Heynckes e ka përcjellë Shaqirin në dy stërvitjet e para dhe mënjëherë ka shfaqur vlerësimin për të. Shaqiri, pa përfunduar edicioni i shkuar, pati zyrtarizuar kalimin e tij te Bayerni nga Baseli për një dëmshpërblim prej 12.5 milionë eurosh. Heynckes e përshkroi Shaqirin si një “futbollist të rrugës që luan me intuitë”.