Bastisen zyrat e deputetëve të Vetëvendosjes, Policia thërret deputetët për t’i marrë në pyetje

Sot rreth orës 18:00, pa praninë e deputetëve dhe pas orarit të punës, në zyrat e Kuvendit të Kosovës ka ndodhur një akt i paprecedent i ushtrimit të pushtetit autoritar. Policia e Kosovës e cila duhet të sigurojë paprekshmërinë e organit përfaqësues të sovranit, ka bastisur zyrat e deputetëve dhe të Grupit Parlamentar të subjektit më të madh opozitar në vend, Lëvizjes VETËVENDOSJE!.

Policia e Kosovës përveç bastisjes, ka filluar të ushtrojë presion ndaj vetë deputetëve, duke ftuar në intervistë deputetët Albin Kurti dhe Albulena Haxhiu në lidhje me aksionet e opozitës në Kuvend.

Ky presion ndodh, pikërisht pas dorëzimit të padisë për Armend Zemajn, i cili ka shprehur publikisht qëllimin e tij për të goditur me gotë të qelqtë deputetët e VETËVENDOSJE!-s dhe për t’i dëmtuar fizikisht ata ndërkohë që Policia asnjë veprim nuk e mori ndaj tij.

Këto ndodhi të papranueshme vijnë menjëherë pasi që Kryetari i Kuvendit, Kadri Veseli, organizoi një takim me ambasadorët e vendeve të Kuintit. Siç duket, Kadri Veseli po e përdor takimin me ambasadorët e Kuintit për të legjitimuar shtimin e represionit dhe dhunimin e opozitës. Ish-kryetari i SHIK-ut u përpoq për disa ditë të përdorë maskën demokratike e paqësore, por tashmë përballë vendosmërisë së opozitës, Veseli po e shfaq sërish fytyrën e tij të vërtetë, atë të vjetrën!

Pas thirrjes dhe presionit publik që ditët e fundit kryeministri Mustafa ia ka bërë policisë dhe gjyqësorit që të angazhohen kundër aktivistëve dhe anëtarëve të opozitës, këta institucione janë vënë krejtësisht në shërbim të pushtetit.

Mustafa, i cili veten e vet e ka vënë krejtësisht në shërbim e në mbrojtje të Zajednicës, tashmë po e vendos edhe Policinë e Kosovës, Prokurorinë dhe Sistemin Gjyqësor po ashtu në mbrojtje të projektit më të dëmshëm ndaj sovranitetit dhe integritetit të Republikës sonë. Por çdo përpjekje e tillë do të dështojë. “Zajednica” nuk do të kalojë!

Ne ia bëjmë të qartë Qeverisë dhe Kryetarit të Kuvendit se veprimet e tilla si dhe kërcënimet për arrestimin e deputetëve Albin Kurti dhe Albulan Haxhiu do ta tensionojnë edhe më shumë situatën dhe përgjegjësia për këtë i mbetet vetëm pushtetit.

Policia konfirmon bastisjen në zyrat e deputetëve të VV-së në Kuvend

Policia e Kosovës konfirmon se në orët e mbrëmjes ka bastisur zyrat e deputetëve të Lëvizjes Vetëvendosje, që gjenden në Kuvendin e Kosovës.
Sipas zëdhënësit të Policisë së Kosovës, Baki Kelani, bastisja është bërë me urdhër të prokurorit kompetent.

“Konfirmojmë se sot në orët e mbrëmjes, me urdhër të prokurorit policia ka realizuar një kontroll në zyrat e grupit parlamentar të Lëvizjes Vetëvendosje që gjenden në Kuvendin e Kosovës”, ka thënë zëdhënësi Kelani për KosovaPress.

Bastisja e zyrave të VV-së: Reagon AAK dhe Nisma

AAK i merr me shqetësim njoftimet se Policia e Kosovës, pas orarit të punës dhe pa praninë e deputetëve, i ka bastisur zyrat e Grupi Parlamentar të VV-së, në Kuvendin e Kosovës, thuhet në reagimin e këtij subjekti.
“Këtë veprim të policisë, e cilësojmë presion, politikisht të kalkuluar, mbi deputetët e Vetëvendosjes, të cilët tashmë janë pjesë e një fronti të përbashkët opozitar për kundërshtimin e Asociacionit dhe Demarkacionit. U bëjmë thirrje urdhërdhënësve të këtyre bastisjeve, që të merren me eliminimin e shkaqeve të një gjendjeje, aspak normale politike, e jo ta rrisin presionin mbi përfaqësuesit e zgjedhur të popullit. Rendi dhe Ligji mbrohen duke filluar nga Kushtetuta, në mbrojtje të se cilës janë vënë këta deputetë, e jo duke i bastisur e përndjekur ata”, thuhet në reagim.

Edhe Nisma për Kosovën shprehet kundër bastisjes, ana e Policisë, të zyrave të deputetëve të Lëvizjes Vetëvendosje në Kuvendin e Kosovës.

“Presioni policor ndaj deputetëve, duke i ftuar në intervistë dhe duke i kërcënuar me arrestim deputetët Albin Kurti dhe Albulena Haxhiu në lidhje me veprimet e fundit të opozitës në Kuvend, janë veprime pa precedent të pushtetit aktual, veprime këto që nuk kanë guxuar asesi që të ndodhin. NISMA për Kosovën dënon veprimet tilla dhe i bën thirrje organeve relevante të zbatimit të ligjit që të mos lejojnë të përdoren nga politika. Veprimet e opozitës janë politike prandaj asnjë masë policore nuk do të mund të frikësoj dhe zbraps opozitën e bashkuar”, thuhet në reagimin e këtij subjekti. /Telegrafi/