Bashkësia Islame dhe donatorët gjilanas shtrojnë iftar në qendrën e Gjilanit

Gjilan – Rreth 1,000 mijë qytetarë gjilanas kanë qenë të ftuar në iftarin e organizuar nga disa donatorë vendas në bashkëpunim me Kryesinë e Bashkësisë Islame në Gjilan. Platoja pranë Teatrit të Qytetit të Gjilanit u shndërrua në një ambient të mrekullueshëm pranë perëndimit të diellit, deri sa qindra, mijëra besimtarë kanë kryer iftarin në ditën e mërkurë.

Në iftarin e shtruar në qendrën e qytetit, morën pjesë edhe anëtarët e Këshillit të Bashkësisë Islame të Kosovës, me në krye myftiun Naim Tërnava, si dhe përfaqësues të disa organizatave të ndryshme në vend.

Në fjalimin e rastit, myftiu Naim Tërnava përshëndeti të gjithë të besimtarët e besimit islam si dhe donatorët që e kanë mundësuar këtë iftar të madh, duke shpresuar se qytetarët gjilanas do ta vazhdojnë traditën e organizimit të mirëfillta në Muajin e Bekuar të Ramazanit.

Tërnava gjithashtu dënoi ashpër sulmet e fundit në shtetin e Turqisë, me ç’rast mbetën të vdekur shumë persona dhe uroi që paqja të mbizotërojë në gjithë botën.

Gjithashtu edhe Kryetari i Bashkësisë Islame në Gjilan, Naim Aliu, përshëndeti të pranishmit dhe falënderoi të gjithë kontribuuesit që kanë ndihmuar në shtrimin e këtij iftari.

Ndërkohë, në emër të Komunës së Gjilanit foli nënkryetari i saj Rexhep Kadriu që gjithashtu përshëndeti besimtarët e komunitetit musliman për iftarin e shtruar mu në zemrën e qytetit./drilon sylejmani/rajonipress/