Bashkë në protestë

Opozita kosovare do të mundë të bashkohet përsëri në organizimin e protestave për t’i kundërshtuar marrëveshjet për Demarkacionin me Malin e Zi dhe Asociacionin e Komunave me shumicë Serbe.

Ndonëse nuk është caktuar ndonjë datë e protestës për t’i kundërshtuar këto marrëveshje deputetja e AAK-së, Teuta Haxhiu, ka deklaruar për gazetën “Zëri” se cilido subjekt politik që organizon protesta për t’i kundërshtuar këto marrëveshje AAK-ja do t’i bashkohet.

Ajo ka kërkuar që këto marrëveshje të hiqen nga rendi i ditës së Kuvendit, pasi që, siç thotë ajo, çdo iniciativë e pushtetit për t’i ratifikuar ato do të kundërshtohet fuqishëm nga opozita.

Haxhiu madje ka thënë se deputetët e AAK-së nuk do të kthehen në Kuvend pa u anuluar marrëveshjet, pavarësisht se deputetët e Lëvizjes “Vetëvendosje” tashmë i janë kthyer punës në legjislativ.

Ndërsa Frashër Krasniqi, nga Lëvizja “Vetëvendosje”, thotë se kthimi i këtij subjekti në Kuvend ndikon në kundërshtimin e marrëveshjeve që, sipas tij, janë në dëm të qytetarëve. Ai thotë se aktivitete të ndryshme do të ketë kohë pas kohe. Sa i përket bashkëpunimit me partitë tjera opozitare, Krasniqi thotë se janë të hapur për këdo që ka vullnet për t’i kundërshtuar marrëveshjet./zeri/