Basha e ul Gattuson në bankë të rezervistëve

Prishtinë – Mesfushori kosovar, Vullnet Basha, në shtatë ndeshjet e para të edicionit 2012/2013 të Superligës së Zvicrës nuk ishte aktivizuar fare. Vendin e tij në formacionin bazë të Sionit e kishte zënë futbollisti i njohur italian, Gennaro Gattuso. Por, ndryshe qëndrojnë punët në gjashtë ndeshjet e fundit. Basha që luan në pozitën e mesfushorit defensiv, në këto gjashtë ndeshje të fundit ka lënë në stol Gattusson ose ka luajtur përkrah tij.

Ish-trajneri i Sionit, Sebastian Fournier, pas transferimit të Gatussos e kishte “harruar” Bashën. Por trajneri aktual i ekipit elitar të Zvicrës, Pierre-Andre Schurmann, i beson më shumë Bashës.

“Trajneri i tanishëm më ka njohur edhe më herët dhe ka besim të madh tek unë. Gatusso është një lojtar i madh, por unë nuk i frikësohem aspak. Mua më duhet të punoj dyfish më shumë për të fituar një vend në mesfushë. Gatusso është kapiten i skuadrës dhe po më ndihmon shumë. Për vete dëshiroj të luaj përkrah tij”, ka thënë Basha.(koha)