Baseli rikthehet në garë për titull me Shaqirin si lider – thyhet rekordi i golave të shënuar

Baseli nuk e nisi mirë edicionin aktual të Superligës së Zvicrës, por me kalimin e kohës ka përmirësuar ndjeshëm formën dhe tani është një pretendent serioz për titullin kampion.

Ky përmirësim erdhi kryesisht pas rikthimit të Xherdan Shaqirit në skuadër.

33-vjeçari, i cili tashmë mban edhe shiritin e kapitenit, u kthye në ekipi, pas transferimit nga Chicago Fire në MLS.

Baseli, pas 20 ndeshjeve të luajtura, ka sulmin më të mirë të kampionatit me 46 gola të shënuar. Shaqiri ka dhënë një kontribut të jashtëzakonshëm me 8 gola dhe 11 asistime në të gjitha garat e këtij sezoni.

Në krahasim me edicionin e kaluar, ekipi ka bërë përmirësime të dukshme. Në të njëjtën periudhë vitin e kaluar, Baseli kishte shënuar vetëm 24 gola, ndërsa deri në fund të sezonit arriti shifrën e 45 golave të realizuar.

Aktualisht, Lugano kryeson Superligën me 35 pikë, vetëm një më shumë se Baseli, duke e bërë garën për titull mjaft të hapur.

Baseli do të përballet në ndeshjen e radhës me Zurichun, në një sfidë të rëndësishme që zhvillohet më 2 shkurt. /Telegrafi/