Barrikadimi në Berlin

Kryeministri Ramush Haradinaj në Samitin e Berlinit do ta përsërisë qëndrimin e tij për mosheqjen e taksës ndaj mallrave serbe dhe për moskorrigjimin e kufijve me Serbinë, por do të kërkojë nga Gjermania e nga Franca liberalizimin e vizave për Kosovën. Në anën tjetër, pala serbe do të kërkojë heqjen e taksës dhe kompromis në fazën finale të dialogut, shkruan sot Gazeta “Zëri”.

Kryeministri i Kosovës Ramush Haradinaj pritet të jetë i prerë edhe në takimin e Berlinit me zyrtarët e lartë serbë, të cilëve do t’ua bëjë të qartë se taksa 100 për qind ndaj mallrave serbe nuk do të hiqet, nuk do të ketë korrigjim të kufijve, përderisa kancelares gjermane Angela Merkel dhe presidentit francez Emmanuel Macron do t’ua kërkojë heqjen e vizave me Bashkimin Evropian për kosovarët. Kështu bëjnë të ditur zyrtarë të Qeverisë së Kosovës pak ditë para takimit të së hënës në kryeqendrën gjermane.

Për shkak të këtyre qëndrimeve të Haradinajt, ky i fundit nuk është takuar me presidentin e vendit Hashim Thaçi për t’i unifikuar qëndrimet para këtij takimi, pasi i pari i shtetit të Kosovës disa herë është përplasur me shefin e Qeverisë për çështjen e taksës dhe të kufijve, shkruan Gazeta “Zëri”.