Barrikada nuk hiqet të enjten

“Parku i paqes” nuk do të largohet të enjten, më 15 tetor, e as punët në rivitalizimin e urës së Ibrit nuk do të fillojnë ashtu siç është arritur me Marrëveshjen e 25 gushtit në Bruksel, në mes të Prishtinës dhe Beogradit. Goran Rakiq, kryetar i Mitrovicës së Veriut, ka siguruar se asnjë punë nuk do të bëhet derisa të mos shkruhet memorandumi për përcaktimin e kufijve ndërkomunalë, të cilin, sipas Rakiqit, është dashur të përfundojë më 10 tetor, por që kryetari i Mitrovicës së Jugut, Agim Bahtiri, refuzon ta nënshkruajë.

“Ura mund të mbyllet, por ‘Parku i paqes’ mund të largohet vetëm atëherë kur të dyja palët, komunat Mitrovica e Jugut dhe ajo e Veriut, të pajtohen për nënshkrimin e memorandumit për Marrëveshje të përbashkët të arritur për Përcaktimin e Kufijve Ndërkomunalë, afati i të cilit ka përfunduar më 10 tetor.

Ky memorandum nuk është nënshkruar për arsye se teksti rreth të cilit më herët është dhënë pëlqimi, në ndërkohë është ndryshuar nga pala kosovare e me të cilin tani serbët nuk pajtohen”, ka thënë Rakiq, duke shtuar se me Marrëveshjen e 25 gushtit është paraparë që paraprakisht të nënshkruhet memorandumi për përcaktimin e kufijve administrativë në mes të dy komunave e pastaj të fillojnë aktivitetet rreth zbatimit të marrëveshjes./zeri/