Banorët e lagjes “Arbëria”, kundërshtojnë fuqishëm ndërtimin e një pompe të benzinës

Gjilan – Banorët që ndodhen afër shkollës “Abaz Ajeti” në lagjen “Arberia” ne Gjilan e kanë kundërshtuar fuqishëm një pëlqim të komunës së Gjilanit për vendosjen e një pompe të benzinës afër objekteve private dhe afër shkollës ku frekuentojnë qindra nxënës. Me asnjë çmim nuk do ta lejojmë ndërtimin e kësaj pompe thonë ata.

Një pjesë e banorëve të lagjes “Arbëria” në Gjilan po e kundërshtojnë fuqishëm ndërtimin e një pompe të benzinës afër shkollës “Abaz Ajeti” dhe afër varrezave të qytetit. “Ne jemi të dëshpëruar për qasjen që ka treguar komuna e Gjilanit. Askund në botë nuk ndodhë që një pompë e benzinës të ndërtohet në një hapësirë ku ka popullatë dhje frekuentim të madh të qytetarëve dhe nxënësve” tha një banor i kësaj lagjeje.

Edhe në letrën që komuniteti i kësaj lagjeje i kanë dërguar komunës së Gjilanit i është tërhequr vërejtja drejtorisë së urbanizmit që mos të jep asnjë pëlqim që bije ndesh me kriteret e parapara urbanistike. “Mos jepni asnjë leje dhe asnjë pëlqim për të ndërtuar pompë benzine se[se nuk ka kushte as urbanistike dhe as infrastrukturore që të jepet leja ose pëlqimi” thuhet në ankesën e 10 banorëve dërguar zyrtarëve komunal.

“Ne do ta mbrojmë me çdo kusht të drejtën tonë dhe fuqishëm do të kundërshtojmë çfarëdo investimi që do të fillon në atë pjesë. Jo vetëm protesta, por do të japim maksimumin që ta pengojmë këtë dukuri të shëmtuar dhe këtë qasje devijante” tha njëri nga të nënshkruarit.

Ndërkaq, Agjencia e Menaxhimit Emergjent ka konstatuar se s`ka rrezikshmëri dhe se i është dhënë pëlqimi për vendosjen e pompës në lokacionin i cili po kundërshtohet fuqishëm nga banorët.

“Veda 2 Petroll” me seli në Viti i epet pëlqimi në dokumentacionin investiv teknik mbi masat e parapara për mbrojtje nga zjarri për pikën me furnizim me derivate të naftës me kapacitete të rezervuarve thuhet në njoftimin e kësaj Agjencie./rajonipress/