Banorët e Hodonocit do të jenë të lirë t`i punojnë tokat e tyre në Manjec
Kamenicë – Begzad Sinani ka pritur në një takim disa banorë të fshatit Hodonoc të cilët i kanë pronat e tyre në zonë kufitare me Serbinë. Shqetësimi i tyre ishte i lidhur me pengesat që po ju krijohen atyre nga xhandarmëria serbe për t`i punuar tokat e tyre afër kufirit.
Banoret e Hodonocit kanë shprehur shqetësimin e tyre para Sinanit. “Neve nuk na është lejuar që të dalim të punojmë në tokat e tona pasi që tani është edhe koha për t`i punuar ato, por një gjë e tillë po na pengohet nga xhandarmeria serbe”janë shprehur disa banor të fshatit Hodonoc, raporton rajonipress.
Sinani i premtoi banorëve të Hodonocit, që pas takimit me ta do t`i takoj përfaqësuesit e KFOR-it për t’ia paraqitur shqetësimin tonë.
Sinani në takim me KFOR-in ka biseduar rreth problemit të krijuar në zonën kufitare në Manjec.
“Sot kanë ardhur te kryetari i komunës disa banorë të fshatit Hodonoc, ne si institucion e kemi për obligim që çdo shqetësim të qytetarëve të komunës së Kamenicës të natyrës së tillë t’ia paraqesim organeve kompetente të sigurisë” u tha veç tjerash Sinani përfaqësuesve të KFOR-it.
Si rezultat i këtij takimi doli që të premtën të takohen me fshatarët kryetari Sinani, Policia e Kosovës dhe Komandantin e KFOR-it për ta parë nga afër gjendjen.
Sinani falënderoi përfaqësuesit e KFOR-it amerikan për bashkëpunimin e mirë që e kanë me komunën e Kamenicës./rajonipress/